Ħamrun Ħanin tippromwovi l-qari fost it-tfal, għat-tieni sena konsekuttiva

Bħala parti mill-ħidma tagħha biex tippromwovi l-qari fost it-tfal, għat-tieni sena konsekuttiva, l-organizzazzjoni volontarja Ħamrun Ħanin ippreżentat sett ta’ kotba mis-serje tant maħbuba ‘Karamellu tar-Raħal t’Isfel’, miktuba minn Charles Buttigieg, lill-Iskola Primarja SS tal-Ħamrun, li tifforma parti mill-Kulleġġ San Ġorġ Preca.

Fl-okkażjoni ta’ din il-preżentazzjoni, membri ta’ Ħamrun Ħanin iltaqgħu ma’ wħud mit-tfal ta’ din l-iskola fejn qrawlhom parti mill-istejjer u qasmu ftit mumenti ħelwin flimkien. L-awtur innifsu, kien preżenti għal din l-okkażjoni.

Il-kotba ‘Karamellu tar-Raħal t’Isfel’ huma ġabra ta’ stejjer, dwar it-tfulija f’raħal Malti fi żmien meta t-televixin, il-kompjuter, l-internet u l-mowbajl kienu għadhom iridu jaslu. Karamellu jirrappreżenta tifel li twieled u trabba f’familja ta’ ħaddiem, li kienet tgħix fil-bidu tar-Raħal t’Isfel taż-Żejtun. Ir-rakkonti joffru idea ta’ kif kienu jgħixu t-tfal u l-familji bosta snin ilu, flimkien mad-drawwiet tagħhom, f’ambjent kalm u seren fejn kulħadd kien ikun jaf lil kulħadd u fejn il-praspar fost it-tfal u l-kbar ma kinux neqsin.

Il-litteriżmu huwa għodda fundamentali biex jintlaħqu l-objettivi ewlenin ta’ din l-organizzazzjoni volontarja, li jinkludu l-inklużjoni u l-ħarsien tat-tfal. Billi tippromwovi l-litteriżmu, l-organizzazzjoni timmira li tinkoraġġixxi ambjent sigur u inklussiv fejn kull tifel u tifla jkollhom l-opportunità li jirnexxu. Il-qari jistabbilixxi l-pedament għas-suċċess akkademiku u t-tagħlim tul il-ħajja ta’ tifel.

Id-donazzjoni ġiet ippreżentata lis-Sinjorina Marouska M Farrugia, f’isem il-Kap ta’ l-Iskola is-Sinjorina Johanna Cauchi.

Għall-aħħar tliet snin, Ħamrun Ħanin organizzat diversi attivitajiet fil-komunità, marbuta ma’ inklużjoni, diversità u l-ġlieda kontra d-diskriminazzjoni. Fl-aħħar ġimgħat, din l-organizzazzjoni, li sservi bħala l-fergħa soċjali ta’ Ħamrun Spartans FC, wettqet żjarat f’postijiet bħal Faċilita’ Korrettiva ta’ Kordin, Rainbow Ward u Dar Bjorn, fejn qasmet il-ferħ tar-rebħ tal-10 Kampjonat fost il-membri l-aktar vulnerabbli tas-soċjetà. Dawn l-attivitajiet kienu appoġġjati mill-isponsor ewlieni ta’ Ħamrun Ħanin, Alberta Group.